പ്ലസ് ടു പരീക്ഷാഫലം പ്രഖ്യാപിച്ചു. ഇത്തവണ 77.97 ശതമാനമാണ് വിജയം.

 പ്ലസ് ടു പരീക്ഷാഫലം പ്രഖ്യാപിച്ചു. ഇത്തവണ 77.97 ശതമാനമാണ് വിജയം. വിദ്യാഭ്യാസ മന്ത്രി എന്‍ ഷംസുദ്ദീനാണ് ഫലം പ്രഖ്യാപിച്ചത്.

തിരുവനന്തപുരം: സംസ്ഥാനത്തെ പ്ലസ് ടു പരീക്ഷാഫലം പ്രഖ്യാപിച്ചു. ഇത്തവണ 77.97 ശതമാനമാണ് വിജയം. വിദ്യാഭ്യാസ മന്ത്രി എന്‍ ഷംസുദ്ദീനാണ് ഫലം പ്രഖ്യാപിച്ചത്. കഴിഞ്ഞ വര്‍ഷത്തേക്കാള്‍ 0.16 ശതമാനം വര്‍ധനയാണ് ഇത്തവണ രേഖപ്പെടുത്തിയിരിക്കുന്നത്. മുന്‍വര്‍ഷം വിജയശതമാനം 77.81 ആയിരുന്നു.

പെണ്‍കുട്ടികളുടെ വിജയശതമാനം ആണ്‍കുട്ടികളേക്കാള്‍ കൂടുതലാണെന്നും ഇത് സമൂഹത്തിന് സന്തോഷം നല്‍കുന്ന കാര്യമാണെന്നും വിദ്യാഭ്യാസമന്ത്രി പറഞ്ഞു.

ഹയര്‍സെക്കന്‍ഡറി വിഭാഗത്തില്‍ 1990 സ്‌കൂളുകളില്‍നിന്നായി 3,72,423 വിദ്യാര്‍ഥികളാണ് പരീക്ഷ എഴുതിയത്. ഇതില്‍ 2,90,398 പേര്‍ ഉപരിപഠനത്തിന് യോഗ്യത നേടി. ആണ്‍കുട്ടികളുടെ വിജയശതമാനം 68.41 ആയപ്പോള്‍ പെണ്‍കുട്ടികളുടേത് 86.89 ശതമാനമായി.

എല്ലാ വിഷയങ്ങള്‍ക്കും എ പ്ലസ് നേടിയ വിദ്യാര്‍ഥികളുടെ എണ്ണം 30,561 ആയി. കഴിഞ്ഞ വര്‍ഷം ഇത് 30,145 ആയിരുന്നു. ജില്ലകളില്‍ ഏറ്റവും ഉയര്‍ന്ന വിജയശതമാനം ഇടുക്കിക്കാണ് — 84.64 ശതമാനം. ഏറ്റവും കുറഞ്ഞ വിജയശതമാനം കാസര്‍കോട് ജില്ലയിലാണ്, 71.72 ശതമാനം.

100 ശതമാനം വിജയം നേടിയ 76 സ്‌കൂളുകളുണ്ട്. ഇതില്‍ ഒമ്പത് സര്‍ക്കാര്‍ സ്‌കൂളുകളും 24 എയ്ഡഡ് സ്‌കൂളുകളും 30 അണ്‍എയ്ഡഡ് സ്‌കൂളുകളും 13 സ്‌പെഷ്യല്‍ സ്‌കൂളുകളും ഉള്‍പ്പെടുന്നു.

വൊക്കേഷണല്‍ ഹയര്‍സെക്കന്‍ഡറി വിഭാഗത്തില്‍ 72.49 ശതമാനമാണ് വിജയം. കഴിഞ്ഞ വര്‍ഷത്തേക്കാള്‍ ഉയര്‍ന്ന വിജയനിരക്കാണിത്. ഈ വിഭാഗത്തില്‍ ഏറ്റവും കൂടുതല്‍ വിജയശതമാനം വയനാട് ജില്ലയ്ക്കും ഏറ്റവും കുറവ് കാസര്‍കോട് ജില്ലയ്ക്കുമാണ്.