പാലക്കാട്: മണ്ണാർക്കാട് നടന്ന ഒരു പൊതുചടങ്ങിനിടെ മുൻമന്ത്രി കെ.ടി. ജലീലിന്റെ വിദ്യാർഥിയോടുള്ള പെരുമാറ്റം വിവാദമായി. പരിപാടിക്കിടെ ഒരു വിദ്യാർഥിയെ പൊതുവേദിയിൽ ചോദ്യം ചെയ്യുകയും ശാരീരികമായി സ്പർശിക്കുകയും ചെയ്തതായി പ്രചരിച്ച ദൃശ്യങ്ങളുടെ പശ്ചാത്തലത്തിൽ എംഎസ്എഫ് ശക്തമായ പ്രതിഷേധവുമായി രംഗത്തെത്തി.
വിദ്യാർഥിയെ അപമാനിച്ചതായും ശാരീരികമായി ഉപദ്രവിച്ചതായും ആരോപിച്ച് കെ.ടി. ജലീൽ പൊതുമാപ്പ് പറയണമെന്ന് എംഎസ്എഫ് ആവശ്യപ്പെട്ടു. സംഭവത്തിൽ ബാലാവകാശ കമ്മീഷൻ സ്വമേധയാ കേസെടുത്ത് അന്വേഷണം നടത്തണമെന്നും സംഘടന ആവശ്യപ്പെട്ടു.
പരിപാടിക്കിടെ ചില വിദ്യാർഥികളോട് വിലാസം എഴുതാൻ ആവശ്യപ്പെട്ടതായും, ഒരു വിദ്യാർഥി എഴുതിയതിൽ പിഴവുണ്ടെന്ന് ചൂണ്ടിക്കാട്ടിയ ശേഷം കുട്ടിയുടെ ചെവിയിൽ നുള്ളുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് സംഭവം വിവാദമായത്.
വിദ്യാർഥികളെ പൊതുവേദിയിൽ അപമാനിക്കുന്നതും ശാരീരികമായി സ്പർശിക്കുന്നതും അംഗീകരിക്കാനാവില്ലെന്നും, കുട്ടികളുടെ അവകാശങ്ങൾ സംരക്ഷിക്കാൻ ബന്ധപ്പെട്ട അധികാരികൾ ഇടപെടണമെന്നും എംഎസ്എഫ് നേതാക്കൾ ആവശ്യപ്പെട്ടു.
